O seu primeiro posto como director

En 1982, aos 25 anos, a súa carreira dá un xiro importante ao ser nomeado director da Coral Polifónica El Eco da Coruña, unha importante formación histórica moi arraigada na cidade. O seu principal cometido é preparar os coros para a tempada de ópera da cidade herculina. Asumirá a dirección en dúas etapas distintas: de 1982 a 1986 e de 2007 a 2011. Esta oportunidade ábrelle as portas ao mundo coral, a ópera, a zarzuela e á dirección de orquestra, co que levaba tempo soñando. Será o punto de partida para decidirse pola dirección orquestral e comezar os estudos no Real Conservatorio Superior de Música de Madrid, onde asiste a clases entre 1986 e 1992.

Concerto de El Eco no teatro Colón con motivo do Día das Forzas Armadas en 1985

Primeira etapa (1982-1986)

Na súa primeira etapa como director de El Eco, interpreta concertos polifónicos por todo o territorio galego e encárgase principalmente de preparar as partes corais para os Festivais de Amigos da Ópera da Coruña.

• Na tempada 1983, interpretarán La Forza del Destino, de G. Verdi, O Barbeiro de Sevilla, de Rossini, e Andrea Chénier, de Umberto Giordano.
• Na tempada 1984, interpretarase Aída, de G. Verdi, A Italiana en Arxel, de Rossini, e Carmen, de G. Bizet.
• En 1985, prepara a ópera Otelo, de G. Verdi, para ser interpretada no Auditorio Conde Duque de Madrid.